Eis nächst Invitée ass d'Koloratursopranistin, Pianistin a Komponistion Stephany Ortega. An hirer Heemecht der Dominikanescher Republik, fänkt si mat 10 Joer u Piano ze spillen. Si kënnt aus einfache Verhältnisser a spillt déi éischt 7 Joer ouni mol e Piano doheem ze hunn. Hir Kolleege warnen si: als Musekerin géing si iergendwann erhéngeren. Si ass awer determinéiert a mat der Ënnerstëtzung vun hirer Famill mécht si weider, mam Zil "glécklech ze sinn".

Mat 23 kënnt si op Lëtzebuerg. Wéinst der Léift a fir Piano ze studéieren. Do fänkt si ënner anerem och un am INECC Chouerleedung ze léieren an hëlt Gesangscoursen fir hirem Chouer besser hëllefen ze kënnen. Op eemol soll si an der Philharmonie optrieden. Bei der Generalprouf virum Concert gëtt hir réischt bewosst, datt si zesumme mat de Lëtzebuerger Philharmoniker optriede soll. Wou si dunn op der Bün vum engem volle grousse Sall steet, huet si eng Offenbarung: Genee dat wëll si, op enger Bün viru Leit sangen.

Zanterhier ass si op der ganzer Welt opgetrueden, souwuel an Europa wéi och a Südamerika an och a China, wou si 5 Joer laang gelieft huet.
An dëser Episod vu Klassik Talk erzielt si dem Marie Trussart ënner anerem déi Challengen, déi si iwwerwanne misst fir dohinner ze komme, wou si haut ass. Ier si Gesang studéiert huet, hat d'Stephany Ortega d'Oper eigentlech iwwerhaapt net gären, si war méi am Pop oder Jazz doheem. Haut séngt si vun Allem a probéiert ëmmer nees d'Grenze vun de Genren ze sprengen. Si erzielt iwwer den diverse Public, virun deem si schonn opgetrueden ass a wéi deen allkéiers aner Besoinen huet: de Südamerikaneschen, Westeuropäeschen, Asiateschen, mee och wat Puppelcher als Public ganz besonnesch mécht.

D'Playlist vun der Stephany Ortega