Een éischte Point konnt de Mëtteg gemaach ginn, erkläert de Patrick Majerus vum HCPN.
“De CGDIS huet méi wéi duebel souvill Leit am Asaz, wéi se dat am normale Fall hätten, fir e Virowend vun Nationalfeierdag. De Bilan vun der Santé ass deen, datt se awer gëschter an och haut am Laf vum Dag, eng liicht Hausse vu Patienten an den Urgencë gemierkt hunn.”
Bis ewell hätten alleguer d’Servicer nach déi néideg Kapazitéiten, esou nach de Patrick Majerus.
Hëtztwell kéint nach Deeg unhalen
Zënter de Mëtteg gëllt wéinst der extreemer Hëtzt fir dat ganzt Land eng rout (déi héchst) Wiederwarnung vu Meteolux: Am Nomëtteg gi bis zu 35 Grad gemellt. Vun e Mëttwoch u sollen d‘Temperaturen sech dann nach emol verstäerken an am Duerchschnëtt tëscht 35 a 40 Grad leien.
Dat mellt d‘Cellule d‘evaluation des risques intempéries et inondations (CERI) no enger Reunioun de Moien. Well et och an der Nuecht nëmme wéineg ofkillt a kee Ree gemellt ass, wier dës Hëtztwell besonnesch haart, heescht et weider.
De CGDIS wier verstäerkt opgestallt an excpetionnel mobiliséiert wärend der ganzer Hëtztwell. D‘Feierlechkeete fir den Nationalfeierdag muer goufen dann och ugepasst. D‘Gemeng Iechternach mellt notamment, datt de Cortège um Virowend haut ofgesot ass. De Rescht vum Programm wier awer onverännert.
Neie Bilan vum CGDIS: 46 Prozent méi Asätz wéinst der Hëtzt
D’Rettungsdéngschter melle gëschter 305 Asätz. Dat wier eng Hausse vu 46 Prozent par rapport zu dem normale Betrib, esou de CGDIS an engem Communiqué.
Déi Lénk fuerderen Aarbechts-Stopp
Et gëllt de Message, säi Verhale virun allem am Fräien un déi héich Temperaturen unzepassen. Ënner anerem sollt ee vill Waasser drénken a physesch Aktivitéiten dobausse vermeiden.
Déi Lénk fuerderen iwwerdeems an engem Communiqué, datt d‘Regierung misst een Aarbechts-Stopp ausruffe fir déi Beschäftegt ze schützen – an dat bei vollstännegem Lounerhalt. Dat misst gëllen, esoubal Temperaturen erreecht ginn, déi fir d‘Gesondheet geféierlech wieren a fir Beschäftegter, déi dobausse respektiv an net-klimatiséierte Räim misste schaffen.
Net verbindlech Empfeelungen an Appeller un déi "gutt Praxis“ vun de Betriber, wéi d’Regierung se bis elo applizéiert, géifen net duergoen, heescht et an engem Communiqué.
Um Weekend scho 40 Prozent méi Asätz
De CGDIS huet d'Ekippe vun de Rettungsdéngschter verstäerkt fir d'Sécherheet ze garantéieren. Et hätt een elo mol 25 Prozent méi Effektive mobiliséiert. Op där enger Säit, well fir den Ament ganz vill Manifestatioune wieren, esou de CGDIS-Direkter Paul Schroeder am 100,7-Interview.
"Duerch déi Augmentatioun vun der Temperatur, datt mir mat méi Asaz rechnen, 25 bis 50 Prozent zu normalen. Dat ass gëschter och schonn agetraff, iwwer de Weekend, wou mir schonn eng Augmentatioun vu ronn 40 Prozent festgestallt hunn"
Hëtzt: Kann eng Gefor si fir jiddereen
Am 100,7-Interview erkläert den Direkter vun der Santésdirektioun, de Jean-Claude Schmit, datt et zwar fir den Ament nach roueg ass an de Spideeler, mee datt bei Hëtzt dacks d'Problemer eréischt e puer Deeg méi spéit optauchen.
"Da kënnt ee gewëssenen Epuisement vum Kierper bei verschiddene Leit, déi méi vulnerabel sinn. An et ass eigentlech dee Moment wou mir gesinn, datt Leit méi an d’Urgencë ginn oder méi hospitaliséiert ginn. Dat heescht, am Moment ass et roueg, mir sinn awer ganz opmierksam."
Déi héich Temperature kéinten eng Gefor fir jidderee sinn. Dobäi misst tëschent zwou verschiddene Saachen differenzéiert ginn, esou de Jean-Claude Schmit.
"Dat eent ass déi akut Symptomer, Hëtzschlag. Dat ka jidderengem passéieren, wann een ze laang dobaussen an der Sonn ass bei héijen Temperaturen. Da gëtt et engem schlecht, et gëtt engem iwwelzeg, de Bluttdrock schwankt. Et fillt ee sech net gutt an et kann ee Féiwer maachen."
Déi aner Gefor wier méi chronesch, esou de Santésdirekter.
"De Stress, deen d'Hëtzt op de Kierper mécht bei vulnerabele Leit, wéi bei eelere Persounen, déi chronesch krank sinn. Dat mécht, datt ee gewëssene Moment déi Leit decompenséieren an da kann et zu Komplikatioune kommen an eventuell och zum Besoin déi Leit ze hospitaliséieren."
D'Cellule d'évaluation des risques intempéries et inondations CERI hat e Samschdeg schonn déi rout Warnung vun haut un ausgeruff, an dat fir déi ganz Woch, op d'mannst bis e Freideg. D'Cellule kënnt de Moien nees zesummen. Si huet een Operatiounsposten am nationale Krisenzenter zu Senneng en place gesat, fir méiglech Asätz ze koordinéieren.
Wéi ginn d'Schoule mat der Hëtzt ëm?
Den Educatiounsministère sot eis de Moien op Nofro hin, datt 31 Grondschoule wéinst der Hëtzt haut Amenagementer virgesinn hunn. D‘Kanner kéinten éischter heem goen, en Accueil géif awer assuréiert ginn.
Ënner de Gemengen, wou de Mëtteg keng Schoul ass, sinn Diddeleng, Rëmeleng, Keel, Gréiwemaacher, Réiser, Jonglënster a Conter. Zu Iechternach ass Schoul, mee d‘Coursë ginn ugepasst, d‘Kanner géife Filmer kucken, esou d‘Gemeng.
Aus der Haaptstad gëtt et bis elo keng offiziell Kommunikatioun, wat d‘Schoulen ugeet. De Stater CSV-Schäffe Paul Galles seet haut am Wort, datt all d‘Schoulpresidenten an Enseignanten an der Stad Recommandatioune kruten, wéi si an hire Schoule mat Hëtzt kënnen ëmgoen, zum Beispill kéinte si a méi kill Säll wiesselen.
Den Educatiounsministère hat d‘lescht Woch scho matgedeelt, datt et kee generellt Schoulfräi gëtt, well all Gebai ënnerschiddlech ass an dofir kënnen d'Gemengen Dispense ginn.
Fir d‘Lycéeë gouf den Educatiounsministère eng Instruktioun eraus, fir wärend der Canicule opzepassen, datt d‘Prüfungssituatiounen an adequate Konditioune kënnen oflafen. Dat kéint vu Gebai zu Gebai ënnerschiddlech sinn. Eng Adaptatioun, déi d‘Lycéeë virhuele kéinten, wier zum Beispill, datt Prüfungen op moies verluecht géife ginn.
Ganz kleng Kanner wieren iwwerdeems héich vulnerabel, esou de Jean-Claude Schmit.
"Do ass de Risiko d'Deshydratatioun. Dat heescht, déi mussen natierlech genuch drénken."
Beispillsweis kéint méi Waasser an de Biberon gemëscht ginn. Natierlech sollte kleng Kanner och net der Sonn exposéiert sinn, esou nach de Santésdirekter.
Festivitéite ronderëm Nationalfeierdag
D‘Hëtzt huet dann och en Afloss op d‘Feierlechkeete ronderëm Nationalfeierdag. Och do hunn eng Partie Gemengen de Programm vun de Festivitéite geännert.
An der Stad ass bis elo alles, wéi et geplangt war. Fir Nationalfeierdag selwer goufen awer eng Rei Mesuren ergraff.
De Jean-Claude Schmit betount am 100,7-Interview, datt vulnerabel Leit am beschte sollen doheem bleiwen. Och owes géif et nämlech nach waarm bleiwen.
"Fir de CGDIS ass een normalen Nationalfeierdag schonn eng Situatioun, wou se ganz vill Aarbecht hunn. Wann elo d'Hëtzt dobäikënnt, kéint de Punkt kommen, wou se un hir Limitte géife kommen, d'Spideeler un hir Limitte kommen. Dat wëlle mir natierlech evitéieren. Dofir den Appell un déi Leit dann éischter doheem ze bleiwen."
Wéi de Guy Bley, de Commissaire à la Sécurité nationale, am 100,7-Interview sot, wäerten d‘Tenue wärend der Militärparad ugepasst kënne ginn. An et gëtt och dofir gesuergt, datt jidderee genuch Waasser huet. Och op d‘Hënn soll bei der Hëtzt opgepasst ginn, sot de Guy Bley, dëst Joer soll d‘Hondsstaffel net beim Defilé matgoen.
An den Nopeschlänner ass d'Situatioun änlech
Och an de Nopeschlänner gouf d‘Hëtztwell nach méi intensiv. A Frankräich gëllt déi maximal Warnung rout haut fir 49 Departementer, also bal d‘Hallschent. 35 Millioune Leit si betraff. Et gëtt domat gerechent, datt haut dee wäermsten Dag zënter den Opzeechnungen a Frankräich kéint gemooss ginn.
D‘Canicule huet e massiven Impakt op d‘Schoulen. Eng 845 Schoulen a Kolléischer a Frankräich bleiwen haut zou an 1.800 anerer hunn hir Horairen ugepasst, esou France Info.
Den Zuchverkéier ass och staark perturbéiert. Déi franséisch Bunn SNCF huet vulnerabele Leit haut geroden, wa méiglech keen Zuch ze huelen. Zënter e Freideg goufen Dosenden Zich a Frankräich annuléiert.
Iwwerdeems ass a Frankräich op ville Plazen den Alkoholkonsum dobausse verbueden.
Hëtzt an Alkohol géife sech net gutt verdroen, esou de Jean-Claude Schmit.
"Den Alkohol favoriséiert d'Deshydratatioun. (...) Dat heescht och den Appell natierlech un d'Leit gemässegt mam Alkohol ëmzegoen an dann op där anerer Säit och genuch Waasser ze drénken."
Eng Fläsch Waasser sollt een dofir dobäi hunn, esou de Jean-Claude Schmit.
